Mennad ABU a-enep da drevadenniñ Palestina : kounnaret Netanyahou !

Un diviz istorel e c’hallfe bezañ hini Aozadur ar Broadoù Unanet. Ur mennad a zo bet votet evit kondaoniñ trevadenniñ Israel e Palestina. Pevarzek ezel eus ar bodad o deus votet a-du gant ar mennad 2334, hag ar Stadoù-Unanet zo chomet hep votiñ, hep lakaat o veto evit ar wech kentañ e gwirionez. A-viskoazh eo bet gwarezet Israel gant veto ar Stadoù-Unanet. Prezidant Obama en deus divizet leuskel ur prof da dTrump a-raok mont kuit. E-barzh ar mennad e vez lavaret e ranker paouez gant an trevadenniñ e Palestina, Jeruzalem-Reter ivez.

Ha n’en deus ket daleet Benyamin Netanyahou evit embann ne cheñch netra evitañ ar mennad-mañ. Ha kendalc’het e vo gant an trevadenniñ e Palestina. Daoust da se eo fuloret Ministr Kentañ Israel. Divizet en deus kastizañ ar broioù o doa kinniget ar mennad. E penn-kentañ e oa ur mennozh bet empennet gant Ejipt. Dimerc’her e oa hag an holl a zo bet souezhet gant o intrudu. Donald Trump en deus pouezet da vat war ar prezidant Abdel Fattah Al-Sissi evit ma vefe dilezet ar mennad-se. N’en doa ket c’hoant da gaout darempredoù fall gant ar prezidant nevez neuze o deus tennet o zestenn. Met da c’houde eo bet adtapet gant peder bro all : Venezuela, Malaysia, Zeland-Nevez ha Senegal.

Kinniget o deus rik an hevelep testenn ha dec’h e oa bet votet. Hiziv neuze en deus embannet Netanyahou e vo galvet en-dro kannadourien Israel e Senegal hag e Zeland-Nevez. Dre ma n’o deus darempred ebet gant Venezuela ha Malaysia ne vo graet netra a-enep dezho. Nullet en deus ivez gweladenn Ministr an Aferioù Diavaez senegalat e Israel e miz Genver, nullet ivez an holl brogrammoù skoazell evit Senegal ha nullet ivez donedigezh kannadourien Zeland-Nevez ha Senegal da Israel. Diskouez a ra mat pegen direnket eo Netanyahou gant an afer. Marteze emeur en ur gammdro da geñver politikerezh broioù ar C’hornôg hag Israel.