Nozvezh gala e Plabenneg evit C’hwi a gano !

Tapis ruz, poltrederien, saeoù brav ha gwiskamantoù cheuc’h, heñvel a-walc’h ouzh festival Cannes e oa deuet da vezañ Sal Tangi Malmanche e Plabenneg digwener dremenet. The place to be e oa zoken ! Skignet e oa bet evit ar wech kentañ er bed ar stirad hirc’hortozet C’hwi a gano ! Ur stirad mod c’hoarigan amerikan pe saoz, siellet “produet e Breizh”, pe “produet e Bro-Leon” kentoc’h dre m’eo bet graet pep tra e korn-bro Plabenneg.

Un nozvezh a-feson a oa bet prientet gant renerien ar stirad nevez-mañ a vo embannet e bemp rannad bep Sul adalek hiziv war YouTube. Souezhadennoù a bep seurt, atersadennoù gwir an aktourien hag ar skipailh ren, dirak un 300 bennak a arvesterien. Ur mennozh ganet e spered div blac’h yaouank, Perynn Bleunven ha Justine Morvan, ur reuziad amzer ’zo. Awenet int bet gant o eñvorennoù krennardezed hag ar filmoù a blij dezho. Heuliet e vez Lili e-barzh he lise An Nor Digor, ul lise gouestlet d’an arzoù : dañs, kan, sonerezh,… Diaes eo dezhi kavout he flas etre ar pezh he deus c’hoant da vezañ hag ar strolladoù all, dreist-holl al Leon Bitches, gwir steredennoù al lise.

Ezhomm a zo bet eus kalz tud evit ober war-dro pep tra : filmañ, frammañ, c’hoari, aozañ, ober war-dro an dud a-youl vat,… Filmet e oa bet ar rannadoù e-pad div sizhun e fin miz Eost diwezhañ. Un disoc’h brav, dreist-holl pa ouzer n’eus ket bet lakaet tost gwenneg ebet e-barzh, an dafar zo bet prestet dezho hag an aktourien a oa a-youl vat.

Un dra nevez eo e bed ar brezhoneg hep mar ebet, un dra hag a blijo kalz d’ar re yaouank, peadra da ziskouez da dout an dud ar pezh a c’haller ober e brezhoneg. Plijusoc’h c’hoazh eo dre ma vez santet eo naturel implij ar yezh ha n’eo ket un ober stourm e mod ebet. Meuliñ a ranker labour an holl dud o deus kemeret perzh er raktres-se. Ur skouer vat eus ar pezh a c’haller ober pa vezer mennet ha pa chomer hep lavaret “n’omp ket gouest”.

Kit ’ta da welet ar rann gentañ.