Paotred al Loc’h

Yann Pier Fulub 1995 (1)

Disul dremenet e oa bet skignet un teul-film dibar e-barzh an abadenn Bali Breizh, anvet Paotred al loc’h. Buhez daou baotr, tro-dro da 50 vloaz hag asambles abaoe ouzhpenn 25 bloaz. Ronan Hirrien a oa bet o filmañ anezhe ar bloaz paseet.

N’eo ket bemdez e vez gwelet seurt traoù er skinwel brezhonek. N’eo ket sur zoken ez eus bet gouestlet un teul-film e brezhoneg d’an heñvelreizhidi c’hoazh. Yann-Bier ha Fulub a gont o istor karantez deomp, kozh a 25 bloaz. Emaint o chom e Kreiz-Breizh, e Purid-Kintin. Yann-Bier zo kelenner ha Fulub skolaer. Brezhonegerien an daou. Gwelet e vezont en o buhez pemdeziek, en o zi, en o farkeier, gant o mignoned pe o familh. Displegañ a reont o c’hejadenn, penaos eo bet o buhez dibaoe, e Kreiz Breizh, o santimantoù hag an diaesterioù o doa bet. Pakset int bet da gentañ ha dimezet abaoe ar bloaz paseet. Digoret o deus da vat o c’halon en un doare simpl ha naturel. Fromus ha brav ken-ha-ken eo an teul-film. Kalonek int bet o vezañ asantet da vezañ filmet evit ar skinwel. Ma n’ho peus ket bet tro da welet, klikit war al liamm.

> Maxime Touzé

Rédacteur. Professeur d'histoire-géographie en breton, responsable d'une association culturelle à Douarnenez, Maxime Touzé écrit aussi pour Le Peuple breton depuis une dizaine d'années. Il est devenu rédacteur en chef adjoint à la langue bretonne en 2016, responsable du cahier mensuel Pobl Vreizh et des articles en breton sur Lepeuplebreton.bzh. [Lire ses articles]