Accueil / À la Une / 28 a viz Meurzh 1942 : oberiadenn Chariot

28 a viz Meurzh 1942 : oberiadenn Chariot

An HMS Campbeltown sanket e-barzh ar c’hae.

D’ar 26 a viz Meurzh 1942, en Aberfal (Falmouth) e zizeorias ar c’h-Campbeltown, ul lestr distrujer kozh eus Breizh-Veur, hag a-gevret gantañ 16 bag vihan o kas soudarded “commando”, ur vag-kanolierezh hag ur vag-tarzher. Pal ar skouadrenn-se, anvet oberiadenn Chariot, a oa distrujañ al lenn-borzh Joubert e Sant-Nazer evit mirout ouzh an Alamaned da zegemer eno an Tirpitz, brasañ lestr-hobregonet e-touesk listri-brezel an Nazied. Bez’ e oa Breizh-Veur en arvar rak ret-mat e oa d’ar vro bezañ pourvezet dre ar mor. Gant listri-spluj an Alamaned e veze distrujet un tamm mat a vagoù Breizh-Veur ken ma oa ar vro war-nes koll ar brezel. Dont a reas paotred Breizh-Veur a-benn eus o zaol d’an 28 a viz Meurzh hag e chomas an Tirpitz betek fin ar brezel en un aber eus Norvegia ’lec’h ma voe distrujet en diwezh gant arme Breizh-Veur. Ker e koustas taol-kaer Sant-Nazer da Vreizh-Veur koulskoude : 104 martolod ha 66 commando a voe lazhet, 215 prizoniet, 14 bag vihan a voe distrujet hep kontañ al lestr-distrujer kozh hag a oa bet kaset da dourtañ ouzh ar skluz hag a darzhas an devezh war-lerc’h o tistrujañ al lenn-borzh Joubert. Met berzh an oberiadenn a oa efedus dindan ur stumm all ivez : reiñ a reas kalon da dud ar vro en ur ziskouez splann dezho e oa posupl trec’hiñ an trede Reich. Pa voe sebeliet e miz Ebrel e Roazhon Tom Mac Cormack ur c’hommando hag a varvas gant e c’houlioù, e teuas 5 000 den da lakaat bleunioù war e vez, ur vanifestadeg a-benn ar fin a-enep an alouberien. Krog e oa ar goanag da vleuniañ adarre e Breizh.

Abaoe 2012 e vez aozet d’an 28 a viz Meurzh bep bloaz bremañ, ul lid-koun etrekeltiek gant an emsaverien a-raok an hini ofisiel graet gant an ti-kêr. Ur boked balan a vez taolet er mor gant ur bugel evit enoriñ ar soudarded kalonek a varvas e 1942. Kelc’h Keltiek Sant-Nazer a gemer perzh koulz hag ar strollad Breizh Sant-Nazer Liberty Group hag a ziskouez dilhad ar soudarded skosat e-pad ar stourm. Hag evel warlene e vo kanet “Chariot of Fire 1942”, ur son bet savet e saozneg gant Per-Vari Kerloc’h. Hevlene ivez e kemero perzh d’an abadenn Kreizenn Enklaskoù Istorel Bro Leon. Degemer mat atav d’ar re a garfe dont di ivez !

> Per Vari Kerloc’h

Avatar
Per Vari Kerloc’h habite à Plouhinec (Finistère). Il a été membre fondateur du Brittany National Pipe Band, premier groupe à arborer le tartan breton. Il a fondé avec Glaoda Maze de Ploudalmézeau, le Breizh Sant Nazer Liberty Group consacré à la reconstitution historique et mettant en exergue la lutte en commun des Peuples de Grande et Petite Bretagne contre le nazisme en 39-45. Il est membre actuel du Bagad Ar Re Gozh de Quimper.