Accueil / Degemer / À la Une / Ar c’helenn divyezhek er skolajoù o vont war gresk ?

Ar c’helenn divyezhek er skolajoù o vont war gresk ?

juin-09-568

Anavezet mat eo ar gudenn gant difennerien ar c’helenn divyezhek brezhoneg/galleg er skolioù publik : kalzik a vugale a chom a-sav goude ar c’hentañ derez. Meur a abeg a zo. En o zouez, an diouer a ginnig : ne blij ket d’ar vugale ha d’o zud ober un hir a hent bemdez etre ar gêr hag ar skolaj, ha pa vefe evit kaout kentelioù e brezhoneg.

A-bouez eo neuze digeriñ hentennoù divyezhek nevez er skolajoù evit reiñ tro d’ar familhoù kavout ur skolaj tost a-walc’h outo ha gallout kenderc’hel gant an dibab o deus graet. E 2017, just-a-walc’h, e c’hallfe mont ar c’helenn divyezhek war gresk er skolajoù : kalzik a raktresoù zo war ar stern evit digeriñ hentennoù divyezhek.

E Kerne e vefe ar muiañ niver. Klasket e vo gouzout hag-eñ e vefe a-walc’h a vugale evit leuniañ klasoù divyezhek e Brieg, e Douarnenez hag e Kastellnevez-ar-Faou. Hentennoù all a c’hallfe bezañ digoret en Oriant hag e Plouha.

War a seblant ne oa ket kaozioù goullo komzoù ar rektor nevez, en doa embannet e felle dezhañ diorren an deskadurezh divyezhek e Breizh. Disklêriet en deus ivez e oa “un identelezh kreñv e akademiezh Roazhon. An emsavadurioù a rank kompren an dra-se ha n’eo klask mougañ anezhi”.

Souezhus eo pa soñjer en opsion “yezhoù Breizh” (gallaoueg ha brezhoneg), lakaet en arvar gant an adreizhadur diwezhañ. Petra eo soñj gwirion pennoù-bras an akademiezh neuze ? Gouvezet e vo e miz Gwengolo, pa vo digoret (pe get) hentennoù nevez. Ma toujer ouzh ar mennozhioù embannet avat, e vo labour evit ar gelennerien brezhoneg a-benn nebeut !

Mat da c’houzout evit ar re a vefe prest da dremen ar C’hapes.

> Jean Roudaut

Jean Roudaut
Jean Roudaut est le pseudo officiel du Peuple breton. Il permet à des personnes qui, pour des raisons professionnelles ou personnelles, ne peuvent s'exprimer sous leur véritable identité de livrer leur réflexion malgré tout. Ce pseudo existe également dans la version papier du Peuple breton.
18736a66a2a68770a44b8e143b58086eGGGG