Accueil / À la Une / Ar c’honterioù Linky ha Gazpar nac’het gant kumunioù ‘zo

Ar c’honterioù Linky ha Gazpar nac’het gant kumunioù ‘zo

Compteur Linky d'ERDF sur le ban de calibrage et test.  energie, equipement electrique, electricite

War-dro hanter-kant milion a gonterioù Linky evit an tredan ha Gazpar evit ar gaz a vo staliet er Frañs evit erlec’hiañ ar c’honterioù a-vremañ. Graet e vez «konterioù speredek» anezhe rak treuzkas a reont titouroù diwar-benn ar beveziñ evit gwellaat an efedusted energetek, hervez ar pal ofisiel. Met nagennet e vez muioc’h-mui abalamour da abegoù yec’hed ha frankiz, ha kumunioù ‘zo a nac’h o staliañ.

Ar c’humunioù a zo perc’henn war ar c’honterioù met da ERDF ha GRDF d’ober war o zro. Evit cheñch anezhe e rank an aozadurioù-se goulenn an aotre digant ar c’humunioù. Ha lod anezhe o deus nac’het reiñ an aotre, un ugent bennak e Frañs a-bezh. Kavout a ra da izili ar c’huzulioù-kêr-se e ya mat en-dro ar sistem a zo e plas, neuze n’eus ket ezhomm da cheñch ha paeañ mizoù ouzhpenn. Ar pezh na blij ket d’an dasparzherien a fell dezhe buanaat al lusk reneveziñ ha ne oant ket en soñj kaout enebiezhoù.

Krog int da erlec’hiañ ar c’honterioù abaoe ar 1añ a viz Kerzu 2015 hag e vo echuet e 2021. Cheñch 35 milion a gonterioù tredan a fell dezhe. Ha war-dro 11 milion a gonterioù gaz. Gant ar c’honterioù-se e vez treuzkaset titouroù, e vez resevet urzhioù a-bell hag e vez muzuliet beveziñ an tiegezhioù war-eeun.

Estreget an arc’hant a vo foeltret o kas d’al lastez konterioù mat ez eus kudennoù a-fed yec’hed evit an annezidi. Gant ar c’honterioù-mañ e vez dilaoskadennoù tredanwarellek (émissions électromagnétiques) hag a c’hallfe bezañ kankreiat. War ar poent-se ec’h embann EDF e touj ouzh ar reoladoù yec’hed met douetañs bras a zo ha nec’het eo kalz a dud gant an efedoù a c’hallfe bezañ war ar c’horfoù. Pep hini a c’hallo nac’hañ cheñch e gonter tredan gant ma vez skrivet ul lizher. N’eus ket pell zo eo Diwan Kraozon hag en deus nac’het e vefe staliet ar c’honterioù nevez. Hag evel un disamm o deus degemeret ar c’heloù e oa bet nac’het gant kumunioù Kraozon ha Lañveog ar c’honterioù-se eno.

> Maxime TOUZE

Rédacteur en chef de la partie en langue bretonne du Peuple breton, Maxime Touzé est également professeur de breton et d'histoire-géographie.